მთვარის გეოლოგიური წარსული მეცნიერებისთვის ჯერ კიდევ ბევრ გამოცანას ინახავს. პრობლემა იმაშია, რომ დღეისთვის არ არსებობს მთვარის ზედაპირის სრული გეოქიმიური რუკა, რაც კვლევებს მნიშვნელოვნად აფერხებს. ტოკიოს მეტროპოლიტენის უნივერსიტეტის მკვლევარებმა კი ამ გამოწვევის გადაჭრის გზა იპოვეს.

მათ მიერ შემუშავებული მცირე ზომის რენტგენული ტელესკოპი მთვარის ორბიტაზე გაგზავნილი სატელიტის საშუალებით შეძლებს ზედაპირის დეტალურ ანალიზს. მეთოდი ეფუძნება რენტგენულ ფლუორესცენციას: ტელესკოპი აფიქსირებს რენტგენულ გამოსხივებას, რომელსაც მთვარის ზედაპირზე არსებული ელემენტები მზის რადიაციის ზემოქმედებისას გამოყოფენ.

ტრადიციული ტელესკოპები ამ მისიისთვის ზედმეტად მძიმე და მოცულობითია. ახალი მოწყობილობა კი, რომელიც თავდაპირველად დედამიწის მაგნიტოსფეროს შესასწავლად შეიქმნა, 10 კილოგრამზე ნაკლებს იწონის. მისი გამძლეობა უკვე შემოწმდა ისეთ რადიაციულ პირობებში, რომლებიც მთვარის ორბიტისთვისაა დამახასიათებელი.

ჩატარებულმა სიმულაციებმა აჩვენა, რომ ერთ ტელესკოპს მთვარის ზედაპირზე ხუთი ძირითადი ელემენტის — ჟანგბადის, რკინის, მაგნიუმის, ალუმინისა და სილიციუმის — რუკის შესაქმნელად ორი წელი დასჭირდება. პროცესი უფრო ეფექტური იქნება 25 ტელესკოპისგან შემდგარი სისტემის გამოყენების შემთხვევაში, რაც მისიის ვადას ერთ წლამდე შეამცირებს.

მთვარის პოლუსებთან არსებული სუსტი რენტგენული სიგნალების მიუხედავად, ეს ტექნოლოგია საშუალებას იძლევა, დავინახოთ ის, რაც აქამდე მიუწვდომელი იყო. მეცნიერთა თქმით, ეს პროექტი მთვარის ევოლუციის შესწავლაში ახალ ერას გახსნის.