მსოფლიო ჩემპიონატის მონაწილე 13-მა ქვეყანამ უეფას პრეზიდენტის, ალექსანდერ ცეფერინის მისამართით კრიტიკული განცხადება გაავრცელა. მიზეზი ცეფერინის მიერ ტურნირის 48-გუნდიანი ფორმატის შეფასება გახდა, სადაც მან აღნიშნა, რომ გაფართოებულ ჩემპიონატზე მრავალი „უნაინტერესო“ მატჩი იმართება.

„ფეხბურთი არ ეკუთვნის რჩეულთა ჯგუფს“

პროტესტს შეუერთდნენ აფრიკის, აზიისა და კარიბის ზღვის აუზის ქვეყნები, მათ შორის: ალჟირი, ეგვიპტე, განა, მაროკო, სენეგალი, სამხრეთ აფრიკა, ტუნისი, კონგოს დემოკრატიული რესპუბლიკა, კაბო-ვერდე, იორდანია, უზბეკეთი, ჰაიტი და კიურასაო. ერთობლივ განცხადებაში ნათქვამია, რომ ეს ქვეყნები ცეფერინის პოზიციას „პატივისცემით, მაგრამ მტკიცედ უარყოფენ“.

„ჩვენი ქვეყნებისთვის არ არსებობს უმნიშვნელო მატჩი მსოფლიო ჩემპიონატზე“, — ნათქვამია ოფიციალურ პოზიციაში. ნაკრებების წარმომადგენლები ხაზს უსვამენ, რომ ფეხბურთის ძალა მის უნივერსალურობაშია და ის არ უნდა ეკუთვნოდეს მხოლოდ საფეხბურთო ელიტას.

ისტორიული მიღწევა და ოცნების ახდენა

მიმდინარე მსოფლიო ჩემპიონატი ისტორიაში ყველაზე მასშტაბურია. წლევანდელი ტურნირი განსაკუთრებით მნიშვნელოვანია დებიუტანტი ქვეყნებისთვის. კაბო-ვერდემ, კიურასაომ, იორდანიამ და უზბეკეთმა მონაწილეობის უფლება პირველად მოიპოვეს, ხოლო კონგოსა და ჰაიტისთვის ეს 1974 წლის შემდეგ პირველი შემთხვევაა.

„თითოეული გუნდის კვალიფიკაცია დამსახურებულია. თითოეული გულშემატკივარი იმსახურებს ოცნებას“, — აღნიშნულია განცხადებაში.

ნაკრებების განცხადებით, უეფას პრეზიდენტის კომენტარი უგულებელყოფს იმ უზარმაზარ შრომასა და ინვესტიციას, რომელსაც ქვეყნები ტურნირზე მოსახვედრად დებენ. ისინი მიიჩნევენ, რომ მსოფლიო ჩემპიონატი მეტია, ვიდრე უბრალოდ სპორტული მოვლენა — ეს არის მომენტი, რომელიც შთააგონებს თაობებს და აერთიანებს მილიონობით ადამიანს.

რა თქვა ცეფერინმა?

კრიტიკა მოჰყვა ლიუბლიანაში გამართულ კონფერენციას, სადაც ცეფერინმა განაცხადა, რომ ტურნირზე ბევრი მატჩია, რომლებიც „სრულიად უინტერესოა“. თუმცა, მანვე დასძინა, რომ პატარა ქვეყნებისთვის მსოფლიო ჩემპიონატის ატმოსფეროს შეგრძნება მნიშვნელოვანი გამოცდილებაა.

მიუხედავად ამ დამაკვალიანებელი ფრაზისა, 13-მა ქვეყანამ ცეფერინის რიტორიკა „ღრმად იმედგაცრუებულად“ შეაფასა. მათი თქმით, ნებისმიერი მატჩის დაკნინება არის უპატივცემულობა მოთამაშეების, მწვრთნელებისა და მთელი თემების მიმართ, რომლებიც საკუთარი ნაკრების წარმატებას ელოდნენ.