ჩინეთის პრეზიდენტი სი ძინპინი ფხენიანში ოფიციალური ვიზიტით ჩავიდა. აეროპორტიდან დაწყებული კიმ ილ სენის მოედნამდე, სადაც სამხედრო საპატიო ყარაული დახვდა, ქალაქი ჩინეთ-კორეის „ურღვევ“ კავშირს ზეიმობდა. სი ძინპინმა კიმ ჩენ ინს განუცხადა, რომ მზადაა, ორმხრივი ურთიერთობები ახალ სიმაღლეებზე აიყვანოს.

თუმცა, პოლიტიკური ანალიტიკოსები თანხმდებიან, რომ ეს ვიზიტი მხოლოდ მეზობლური კავშირების აღდგენას არ ემსახურება. ჩინეთისთვის ჩრდილოეთ კორეა არის მეზობელი, რომლის კონტროლიც შეუძლებელია, ხოლო მისი დაკარგვა — დაუშვებელი.

ბოლო წლებში ორ ქვეყანას შორის ნდობა შეირყა. პეკინს სურს სტაბილურობა საზღვრებთან და გავლენა ფხენიანზე, მაგრამ ამავდროულად, ცდილობს თავი აარიდოს კრიზისებს, რომლებსაც კორეის ბირთვული ამბიციები იწვევს. დიპლომატიური წყაროების ცნობით, ჩინეთს განსაკუთრებით აშფოთებს ჩრდილოეთ კორეისა და რუსეთის დაახლოება.

უკრაინაში შეჭრის შემდეგ, მოსკოვმა და ფხენიანმა სამხედრო თანამშრომლობა გააფართოვეს. BBC-ის კვლევის თანახმად, რუსეთის მხარეს უკვე დაიღუპა დაახლოებით 2 300 ჩრდილოეთ კორეელი ჯარისკაცი. პეკინს ეშინია, რომ რუსეთის გავლენის გაძლიერებამ შესაძლოა ჩინეთის პოზიციები შეასუსტოს.

ეკონომიკური თვალსაზრისით, ჩინეთი კვლავ რჩება ფხენიანის მთავარ დასაყრდენად. გასულ წელს ჩინეთიდან ჩრდილოეთ კორეაში ექსპორტმა 2.3 მილიარდი დოლარი შეადგინა, რაც ბოლო ექვსი წლის განმავლობაში რეკორდული მაჩვენებელია. პეკინი ცდილობს, ეკონომიკური ბერკეტებით კიმ ჩენ ინი ისევ თავის ორბიტაზე დააბრუნოს.

კიმ ჩენ ინისთვის ეს ვიზიტი გადარჩენის ტაქტიკაა. მან იცის, რომ უკრაინაში ომის დასრულების შემდეგ რუსეთის ინტერესი მის მიმართ შესაძლოა შემცირდეს. მიუხედავად იმისა, რომ ორ მხარეს შორის სრული ნდობა არ არსებობს, ორივე ლიდერს ესმის, რომ ერთმანეთი სჭირდებათ — ეს კი საუბრის გაგრძელების ერთადერთი გარანტიაა.