საქართველოს გენერალურმა პროკურატურამ, აშშ-ის საიდუმლო სამსახურთან და პოლონეთის კიბერდანაშაულთან ბრძოლის ცენტრალურ ბიუროსთან თანამშრომლობით, მასშტაბური საერთაშორისო ოპერაცია განახორციელა. შედეგად, აჭარაში ორი უცხო ქვეყნის მოქალაქე დააკავეს, რომლებსაც კრიპტოვალუტის გამოყენებით ფულის გათეთრების სქემაში მონაწილეობას ედავებიან.

სპეცოპერაციაში, რომელსაც ევროპოლისა და ევროიუსტის კოორდინაცია უწევდა, ასამდე გამომძიებელი და ოპერატიული მუშაკი მონაწილეობდა. საგამოძიებო მოქმედებები ჩატარდა ათობით ლოკაციაზე, მათ შორის საცხოვრებელ სახლებსა და ოფისებში.

გამოძიების ვერსიით, დაკავებულები საერთაშორისო ორგანიზებული ჯგუფის წევრები არიან, რომლებიც 2022 წლიდან ე.წ. კრიპტომიქსერ AudiA6-ს მართავდნენ. ეს სერვისი ციფრული აქტივების ტრანზაქციების ისტორიის დამალვას ემსახურებოდა. სწორედ ამ პლატფორმის მეშვეობით, სავარაუდოდ, მოხდა აპრილში 9,5 მილიონი დოლარის ლეგალიზება, რომელიც Ledger Live-ის ყალბი აპლიკაციის საშუალებით 50-ზე მეტ მომხმარებელს მოჰპარეს.

რა ქონება დააყადაღეს სამართალდამცველებმა?

ოპერაციის ფარგლებში, სამართალდამცველებმა ამოიღეს ელექტრონული მტკიცებულებები და დოკუმენტაცია. ამასთან, დაყადაღებულია ეჭვმიტანილთა კუთვნილი მასშტაბური ქონება, მათ შორის:

  • 173 ერთეული ავტომობილი;
  • ძვირადღირებული უძრავი ქონება;
  • საბანკო ანგარიშებზე არსებული ფულადი სახსრები.

გამოძიების შეფასებით, დანაშაულებრივი ჯგუფი ასევე მართავდა Dark2Web-ის ფორუმს, რომელიც კიბერდანაშაულებრივი საქმიანობისთვის, მათ შორის არალეგალური სერვისების რეკლამირებისთვის გამოიყენებოდა.

3 ფოტო — დააჭირე გასადიდებლად

აღსანიშნავია, რომ ოპერაცია დაემთხვა მედიაში გავრცელებულ ინფორმაციას იმის შესახებ, რომ ევროკავშირი რუსეთის წინააღმდეგ სანქციების მორიგ პაკეტში შესაძლოა ქართულ კრიპტო-პლატფორმებსაც მოიაზრებდეს. თუმცა, საქართველოს პროკურატურას დაკავებებისა და სავარაუდო სანქციებს შორის კავშირზე კომენტარი არ გაუკეთებია.