საქართველოს საგარეო საქმეთა სამინისტრომ დიდი ბრიტანეთის ელჩი დაიბარა. უწყების განცხადებით, დიპლომატთან შეხვედრის მიზეზი ლონდონის მიერ გავრცელებული ინფორმაცია გახდა, რომელიც რუსეთის წინააღმდეგ დაწესებულ სანქციებს უკავშირდება.

ბრიტანულმა მხარემ გემი SILVAR-ი რუსეთის წინააღმდეგ დაწესებული სანქციების სიაში შეიყვანა. მათი მტკიცებით, აღნიშნული ხომალდი მიმდინარე წლის თებერვალში საქართველოს, კერძოდ კი კულევის პორტში იმყოფებოდა.

საქართველოს საგარეო უწყებაში ბრიტანულ დიპლომატიურ მისიასთან საუბრისას აღნიშნეს, რომ ქართული მხარე სანქციების თემით მუდმივ სპეკულაციებს გაუგებრად აღიქვამს. სამინისტროში ხაზგასმით აცხადებენ, რომ საქართველომ სანქციების რეჟიმის არცერთი დარღვევა არ დაუშვია.

ქართულმა მხარემ კატეგორიულად მიუღებელი უწოდა ბრიტანეთის საელჩოს მიერ გაკეთებულ აქცენტებს. ოფიციალური თბილისი განმარტავს, რომ იმ პერიოდში, როდესაც გემმა კულევის პორტში შემოვიდა, ის არცერთ სანქცირებულ სიაში არ ფიქსირდებოდა.

გარდა ამისა, საგარეო საქმეთა სამინისტროში ყურადღება გაამახვილეს იმ ფაქტზეც, რომ საქართველოს პორტში შემოსვლამდე გემმა დანიის პორტი გაიარა. ეს ფაქტი კიდევ ერთხელ ადასტურებს, რომ ხომალდი თავისუფლად გადაადგილდებოდა და საქართველოს მხრიდან საერთაშორისო რეგულაციების რაიმე სახის დარღვევას ადგილი არ ჰქონია.

ამ დროისთვის სხვა დეტალები შეხვედრის შესახებ საჯაროდ არ გავრცელებულა. საქართველო აგრძელებს საერთაშორისო ვალდებულებების შესრულებას და სანქციების მონიტორინგის პროცესს საკუთარ საზღვრებსა და პორტებში.