საქართველოს მთავრობამ დუშენის კუნთოვანი დისტროფიით დაავადებული ბავშვებისთვის საჭირო მედიკამენტების შესყიდვის პროცესის დაწყებაზე თანხმობა განაცხადა. გადაწყვეტილება პრემიერ-მინისტრმა ირაკლი კობახიძემ პაციენტების მშობლებთან გამართული შეხვედრის შემდეგ გაახმოვანა.

შეთანხმების თანახმად, იქმნება სპეციალური სამუშაო ჯგუფი, რომელშიც ჯანდაცვის სამინისტროს წარმომადგენლები და მშობლები გაერთიანდებიან. ჯგუფი უშუალოდ აწარმოებს მოლაპარაკებებს ფარმაცევტულ კომპანიებთან მედიკამენტების შესყიდვის პირობების დასაზუსტებლად.

პრემიერის განმარტებით, კონკრეტული მედიკამენტების ჩამონათვალი უკვე შეთანხმებულია, თუმცა მათი დასახელება მოლაპარაკებების პროცესის დასაცავად ჯერჯერობით არ ხმაურდება. საბოლოო გადაწყვეტილება ფარმაცევტული ბაზრის შეთავაზებებისა და სხვადასხვა ფაქტორის გათვალისწინებით მიიღება.

ჯანდაცვის მინისტრმა მიხეილ სარჯველაძემ განაცხადა, რომ სამუშაო ჯგუფი მხოლოდ მედიკამენტების საკითხით არ შემოიფარგლება. მშობლები პროცესის მიმდინარეობის შესახებ მუდმივ რეჟიმში მიიღებენ ინფორმაციას.

რა ვადებში ელოდებიან შედეგს?

მშობლები ვარაუდობენ, რომ ხელისუფლების საბოლოო გადაწყვეტილება უახლოესი ორი თვის განმავლობაში გახდება ცნობილი. შეხვედრის მონაწილე ზაქრო გვიშიანის თქმით, ეს არის დიდი და ღირსეული ბრძოლის შედეგი.

„დაიწყება აქტიური მუშაობა ფარმაცევტულ კომპანიებთან. დაახლოებით ორ თვეში უნდა მივიღოთ საბოლოო გადაწყვეტილება განსახილველი ოთხი პრეპარატიდან ორზე, თუმცა მუშაობა დანარჩენებზეც გაგრძელდება“, — განაცხადა გვიშიანმა.

პროტესტის შეწყვეტა

კიდევ ერთი მშობლის, კახა წიკაურის განცხადებით, საპროტესტო აქციები ოფიციალურად წყდება. თუმცა, კვირას დაგეგმილი მარში მაინც გაიმართება, ოღონდ ის უკვე „მადლიერების აქციის“ ფორმატს მიიღებს.

„ჩვენი მოთხოვნა იყო, რომ ბავშვებს მიეღოთ წამლები და ეს მოხდება. კვირას გამოვალთ, რათა მადლობა გადავუხადოთ ჩვენს მხარდამჭერებს, მთელ საქართველოს და მთავრობას მიღებული გადაწყვეტილებისთვის“, — აღნიშნა წიკაურმა.

დუშენის კუნთოვანი დისტროფია იშვიათი გენეტიკური დაავადებაა, რომელიც კუნთოვანი ძალის თანდათანობით კარგვას იწვევს. საქართველოში ამ დიაგნოზის მქონე დაახლოებით 100 ბავშვია რეგისტრირებული.

3 ფოტო — დააჭირე გასადიდებლად

მშობლების საპროტესტო აქცია მთავრობის ადმინისტრაციასთან 44 დღის განმავლობაში მიმდინარეობდა. ხელისუფლების პოზიციის შეცვლამდე, საზოგადოებრივი კამპანიის ფარგლებში, ბავშვების დასახმარებლად 2 მილიონ ლარზე მეტი თანხა შეგროვდა.