მარნეულისა და ჰუჯაბის ეპისკოპოსი, მეუფე გიორგი ჯამდელიანი საზოგადოებას დიუშენის კუნთოვანი დისტროფიის მქონე ბავშვების მხარდაჭერისკენ მოუწოდებს. ეპისკოპოსი ხაზს უსვამს, რომ დრო ამ შემთხვევაში გადამწყვეტი ფაქტორია და დაუყოვნებლივ რეაგირებას საჭიროებს.
ინიციატივა უკავშირდება საზოგადოების თვითორგანიზებულ ჯგუფს, რომელიც დიუშენის სინდრომით დაავადებულ მცირეწლოვნებს ეხმარება. ეპისკოპოსი მოუწოდებს როგორც კერძო სექტორს, ისე ბიზნესის წარმომადგენლებს, ჩაერთონ ქველმოქმედებაში.
„უმორჩილესად ვთხოვ საზოგადოების ყველა წევრს, ვისაც ღვთის შემწეობით გააჩნია ფინანსური რესურსი, ჩავერთოთ ამ მოძრაობაში. დრო გადამწყვეტი ფაქტორია“, — აცხადებს მეუფე გიორგი.
ეპისკოპოსის თქმით, ბიზნესსექტორს თავად შეუძლია მსგავსი მარათონების დაორგანიზება, რაც დახმარების პროცესს კიდევ უფრო ეფექტიანს გახდის. მან აღნიშნა, რომ ეს არის ღვთისთვის სამადლო საქმე, რომელიც არა მხოლოდ ბავშვების გადარჩენას ემსახურება, არამედ სიკეთის ქმნით ადამიანების სულიერ გაძლიერებასაც უწყობს ხელს.
მეუფე გიორგიმ მაცხოვრის სიტყვები გაიხსენა ბავშვებისადმი დამოკიდებულებაზე: „ვინც ერთ ასეთ ყრმას შეიწყნარებს ჩემი სახელით, თავად მე შემიწყნარებს“. მისი თქმით, ბავშვების დახმარება უმაღლესი ზნეობრივი მოვალეობაა.
დახმარების მსურველთათვის ეპისკოპოსმა ანგარიშის ნომრებიც გაასაჯაროვა:
- თიბისი ბანკი: GE20TB7881145068100026
- საქართველოს ბანკი: GE49BG0000000611756133
დიუშენის კუნთოვანი დისტროფია მძიმე გენეტიკური დაავადებაა, რომელიც კუნთების თანდათანობით დასუსტებას იწვევს. დროული ჩარევა და ფინანსური მხარდაჭერა დაავადებულთა ოჯახებისთვის კრიტიკულად მნიშვნელოვანია.
დისკუსია
0 კომენტარი
ჯერ კომენტარი არ არის — იყავი პირველი.