ვაშინგტონიდან გავრცელებული ინფორმაციით, ილია თოფურიას ჯანმრთელობის მდგომარეობა სტაბილურია. ესპანელი ჟურნალისტის, ირატი პრატის ცნობით, მებრძოლს ქირურგიული ოპერაცია არ ესაჭიროება.

თოფურიამ გასული ღამე ვაშინგტონის ერთ-ერთ კლინიკაში გაატარა. მედიკოსებმა ჩაატარეს კომპიუტერული ტომოგრაფია, რათა მისი მდგომარეობა დეტალურად შეესწავლათ. კვლევის შედეგებით დადასტურდა, რომ მას თვალბუდის მცირე მოტეხილობა აღენიშნება.

3 ფოტო — დააჭირე გასადიდებლად

მიუხედავად დიაგნოზისა, ექიმების გადაწყვეტილება ცალსახაა: ქირურგიული ჩარევა საჭირო არ არის. სპორტსმენს ამჟამად სრული სიმშვიდე და დასვენება ესაჭიროება.

„კარგი ამბავი ვაშინგტონიდან: ილია თოფურია კარგადაა. ისვენებს. ეს არის ის, რაც მათ მითხრეს“, - წერს ჟურნალისტი სოციალურ ქსელში.

შეგახსენებთ, რომ ილია თოფურია, როგორც UFC-ის მოქმედი ჩემპიონი, მუდმივად იმყოფება სპორტული საზოგადოების ყურადღების ცენტრში. მისი ჯანმრთელობის მდგომარეობის შესახებ გავრცელებულმა ინფორმაციამ გულშემატკივრებში დიდი მითქმა-მოთქმა გამოიწვია, თუმცა ოფიციალური ცნობები ადასტურებს, რომ საგანგაშო არაფერია.