ონისე ოქრიაშვილმა სოციალურ ქსელში ვრცელი პოსტი გამოაქვეყნა, სადაც Starring Georgia-ს ფარგლებში დაგეგმილ კანიე ვესტის კონცერტსა და ბერა ივანიშვილის გარემოცვის წარსულს შორის პარალელებს ავლებს. ოქრიაშვილის თქმით, საზოგადოების ნაწილი ივიწყებს იმ ფაქტებს, რომლებიც წლების წინ, 2016 წელს მოხდა.

ავტორი იხსენებს ფარულ ჩანაწერებს, სადაც ბერა ივანიშვილის მხრიდან ინტერნეტში დაფიქსირებული კრიტიკის გამო მოზარდების დაშინების ფაქტები იკვეთება. ოქრიაშვილის მტკიცებით, ანზორ ჩუბინიძე და სხვა პირები 15-16 წლის ბიჭებს სახლებში დაადგნენ, მათზე ფსიქოლოგიური ზეწოლა განახორციელეს და ბოდიშები მოახდევინეს.

„კანკალებდა, ბოდიშებს უხდიდა. იმან უთხრა, დაჯექი მანქანაში, დედა უნდა მოგიტყნაო. ერთ ბავშვს უთხრა ანზორამ, წაგიყვანენ და დაგმარხავენ და ვერავინ ვერაფერს გაიგებს შენზეო“, — ციტირებს ოქრიაშვილი გავრცელებულ ჩანაწერებს.

ონისე ოქრიაშვილი ყურადღებას ამახვილებს Starring Georgia-ს გუნდზეც. მისი თქმით, პროექტის ერთ-ერთი ხელმძღვანელი პირი, ამიკო ჯანელიძე, იმ მოვლენების ეპიცენტრში ფიგურირებს, როდესაც აღნიშნული „რეიდები“ ხორციელდებოდა. ავტორი მიიჩნევს, რომ მსგავსი წარსულის მქონე პირების მონაწილეობა სახელმწიფო ბიუჯეტით დაფინანსებულ მასშტაბურ პროექტებში კითხვის ნიშნებს ბადებს.

„როცა ამხელა უფსკრული ჩნდება ჩვენს შორის, გული მძიმდება. ვერ ამოვივსებ პირს მიწით, როცა თინეიჯერების დამტერორებელს ამხელა ლეგიტიმაციას აძლევთ“, — წერს ოქრიაშვილი. მისი თქმით, ეს პროცესი ქვეყნის ღირებულებითი სისტემის დაზიანების ნაწილია, სადაც კონცერტები და მასშტაბური ღონისძიებები რეალური პრობლემების გადაფარვას ემსახურება.

სტატიაში ხაზგასმულია, რომ ბერა ივანიშვილისთვის ეს საკითხი წარსულში ტელეინტერვიუთი „ჩამოირეცხა“, სადაც მან აღნიშნა, რომ ოჯახის შეურაცხყოფას არავის აპატიებს. თუმცა, ოქრიაშვილისთვის ეს არგუმენტი არასაკმარისია, განსაკუთრებით მაშინ, როდესაც საუბარია სახელმწიფო რესურსებით მხარდაჭერილ კულტურულ პლატფორმებზე.

ონისე ოქრიაშვილი დასკვნის სახით აღნიშნავს, რომ დღევანდელი კონცერტი და მასში ჩართული ადამიანები მხოლოდ ერთი ეპიზოდია იმ დიდი პროცესისა, რომელსაც ის „ქვეყნის დამარხვას“ უწოდებს. მისი პოზიცია მკაფიოა: კულტურული ღონისძიებების მიღმა არსებული პოლიტიკური და მორალური პასუხისმგებლობა უგულებელყოფილი არ უნდა დარჩეს.