რუსეთის პრეზიდენტმა ვლადიმერ პუტინმა ვოლოდიმირ ზელენსკის მიერ გაგზავნილი ღია წერილი მკაცრად გააკრიტიკა. პუტინის განცხადებით, დოკუმენტი, რომელიც ომის დასრულებისკენ მოწოდებებს შეიცავს, „უხეშობის ელემენტებითაა“ შედგენილი.

აღნიშნული შეფასება პუტინმა პეტერბურგის საერთაშორისო ეკონომიკური ფორუმის (SPIEF-2026) პლენარულ სესიაზე გააკეთა. რუსეთის ლიდერმა ეჭვი შეიტანა იმაში, რომ ზელენსკის ინიციატივა რეალურ დიალოგს ემსახურება.

„ეს წერილი ნამდვილად შეიცავს უხეშობის ელემენტებს. ეს არის გზა პირადი შეხვედრისა და მოლაპარაკებებისთვის პირობების შესაქმნელად, თუ პირიქით — ისეთი ვითარების შექმნა, რომლის დროსაც პირადი შეხვედრის გამართვა პრინციპულად შეუძლებელია? მე ვფიქრობ, რომ ეს მეორეა“, — განაცხადა პუტინმა.

უკრაინის პრეზიდენტის ღია წერილი საჯარო ხუთშაბათს გახდა. ზელენსკი რუსეთის პრეზიდენტს ომის დაუყოვნებლივ შეწყვეტისკენ, ცეცხლის შეჩერებისა და პირდაპირი მოლაპარაკებებისკენ მოუწოდებს. უკრაინული მხარე ხაზს უსვამს, რომ არსებული კონფლიქტი პუტინის პირადი არჩევანია და არა გეოპოლიტიკური აუცილებლობა.

ზელენსკის ინიციატივა მოიცავს მესამე ქვეყანაში — მაგალითად, შვეიცარიაში, თურქეთში ან არაბული სამყაროს რომელიმე სახელმწიფოში — შეხვედრის გამართვას. კიევი გამოთქვამს მზადყოფნას, მოლაპარაკებების პერიოდში სრულად შეწყვიტოს ცეცხლი, რასაც აშშ-ის მონიტორინგი გაუწევს.

უკრაინის პრეზიდენტი მოლაპარაკებების პროცესში აშშ-ისა და ევროპის ჩართულობას ითხოვს. ასევე საუბარია ტყვეების გაცვლასა და რუსეთის მიერ გატაცებული ბავშვებისა და მოქალაქეების დაბრუნებაზე. უკრაინის საგარეო საქმეთა მინისტრმა, ანდრიი სიბიგამ დაადასტურა, რომ წერილი რუსეთს დიპლომატიური არხებითაც გადაეგზავნა.