უკრაინის პრეზიდენტმა ვოლოდიმირ ზელენსკიმ რუსეთის პრეზიდენტის უარი უკრაინის ლიდერთან მოლაპარაკებების გამართვაზე ღიად გააკრიტიკა. ზელენსკის განცხადებით, ვლადიმირ პუტინის პასუხი მისი წერილისადმი აჩვენებს, რომ კრემლი ომის გაგრძელებას გეგმავს.

„სამწუხაროდ, რუსეთის მხარე კვლავ ომს ირჩევს. დღეს ყველამ მოისმინა მათი პასუხი, რომელიც სუსტია. მათ უბრალოდ არ სურთ ამ სისხლისღვრის დასრულება“, — აღნიშნა უკრაინის პრეზიდენტმა. მისი თქმით, ეს გადაწყვეტილება მსოფლიოს უმეტესი ნაწილისთვის იმედგაცრუების მომგვრელია.

ზელენსკის შეფასებით, რუსეთის ხელისუფლებას არაფრის შეცვლა არ სურს. ის მიიჩნევს, რომ ომი მხოლოდ პუტინისა და იმ ადამიანების ინტერესებშია, ვინც ამ პროცესით პირდაპირ ფინანსურ სარგებელს იღებს.

3 ფოტო — დააჭირე გასადიდებლად

უკრაინის პრეზიდენტმა ხაზი გაუსვა, რომ საჭიროა რუსეთის ფინანსური რესურსების შეზღუდვა და მოსკოვზე საერთაშორისო ზეწოლის მაქსიმალური გაზრდა. ამ მიზნით, ზელენსკიმ უკვე გამართა კონსულტაციები საკუთარ დიპლომატიურ გუნდთან.

უახლოეს პერიოდში დაგეგმილია შეხვედრები ევროპელ და ამერიკელ პარტნიორებთან, სადაც მხარეები რუსეთის წინააღმდეგ შემდგომ ნაბიჯებს განიხილავენ.

შეგახსენებთ, რომ ვლადიმირ პუტინმა ვოლოდიმირ ზელენსკის წერილის საპასუხოდ განაცხადა, რომ უკრაინის პრეზიდენტთან პირისპირ შეხვედრას აზრს ვერ ხედავს, რითაც დიალოგის გაგრძელების შესაძლებლობა პრაქტიკულად გამორიცხა.