საქართველოში „რუსოფობიის მონიტორინგის საბჭო“ დაფუძნდა

საქართველოში პრორუსული არასამთავრობო ორგანიზაციების ინიციატივით ახალი გაერთიანება — „რუსოფობიის მონიტორინგის საბჭო“ შეიქმნა. ორგანიზატორების განცხადებით, ინიციატივის მთავარი მიზანი საჯარო სივრცეში „ანტირუსული რიტორიკის“, სიძულვილის ენისა და დისკრიმინაციის შემთხვევების გამოვლენა და ანალიზია.

საბჭოს დამფუძნებლები, მათ შორის გულბაათ რცხილაძე და მისი „ევრაზიის ინსტიტუტი“, აცხადებენ, რომ მონიტორინგს გაუწევენ ფიზიკური და იურიდიული პირების როგორც საჯარო გამოსვლებს, ისე პუბლიკაციებს. მათი თქმით, განსაკუთრებული ყურადღება გამახვილდება 2022 წლის თებერვლის შემდგომ პერიოდზე, როდესაც, მათი შეფასებით, საქართველოში ანტირუსული აქციებისა და განცხადებების რაოდენობამ მნიშვნელოვნად იმატა.

რა შედის საბჭოს გეგმებში?

ინიციატივის ფარგლებში იქმნება იურიდიული ჯგუფი. ის დააფიქსირებს ფაქტებს, რომლებიც „რუსოფობიად“ ჩაითვლება — დაწყებული „რუსეთის შესახებ ყალბი ინფორმაციის გავრცელებით“ და ისტორიული მოვლენების დამახინჯებით, დამთავრებული ეთნიკური ნიშნით დისკრიმინაციით.

გულბაათ რცხილაძის თქმით, საბჭო არ შემოიფარგლება მხოლოდ მონიტორინგით. ისინი აპირებენ გადახედონ მოქმედ კანონმდებლობას და საჭიროების შემთხვევაში, შესაბამისი საკანონმდებლო ცვლილებების ინიციატივით გამოვიდნენ, თუკი რომელიმე აქტს „რუსოფობიურის“ შინაარსის მატარებლად მიიჩნევენ.

საერთაშორისო პრაქტიკა და კონტექსტი

აღსანიშნავია, რომ „რუსოფობიის“ ტერმინს კრემლი ხშირად იყენებს საგარეო პოლიტიკური მიზნებისთვის. საერთაშორისო პრაქტიკაში ეს იარლიყი ხშირად მოქმედებს როგორც მექანიზმი ნებისმიერი კრიტიკის გასანეიტრალებლად, იქნება ეს ადამიანის უფლებების დარღვევა, მედიის თავისუფლების შეზღუდვა თუ სხვა ქვეყნების არჩევნებში ჩარევა.

ხშირ შემთხვევაში, რუსული სახელმწიფო მედია საერთაშორისო სანქციებს ან სასამართლო გადაწყვეტილებებს არა საერთაშორისო სამართლის დარღვევის შედეგად, არამედ „კოლექტიური დასავლეთის“ ანტირუსულ კამპანიად წარმოაჩენს. მეზობელ სახელმწიფოებში კი ამ ნარატივს ხშირად იყენებენ „რუსულენოვანი მოსახლეობის დაცვის“ მოტივით, რაც ხშირად წინ უსწრებს სამხედრო ან პოლიტიკურ ჩარევას.

მონიტორინგის საბჭო შედეგებს სამ თვეში ერთხელ გამოაქვეყნებს. გამოვლენილ შემთხვევებს სამართლებრივ შეფასებას მისცემენ და საჭიროების შემთხვევაში, სააპელაციო საჩივრების მომზადებასაც უზრუნველყოფენ.