რუსთავში მომხდარი ფიზიკური დაპირისპირება ტრაგიკულად დასრულდა. შინაგან საქმეთა სამინისტროს ინფორმაციით, კონფლიქტის დროს მამაკაცი წაიქცა და თავის არეში მიღებული მძიმე დაზიანებების შედეგად ადგილზევე გარდაიცვალა.

სამართალდამცველებმა ცხელ კვალზე ჩატარებული საგამოძიებო მოქმედებების შედეგად ერთი პირი დააკავეს. მას ბრალად ჯანმრთელობის განზრახ მძიმე დაზიანება ედება, რამაც სიცოცხლის მოსპობა გამოიწვია.

3 ფოტო — დააჭირე გასადიდებლად

გამოძიების პირველადი ვერსიით, დაკავებულმა მამაკაცზე ფიზიკურად იძალადა, რასაც შემდგომში მსხვერპლის წაქცევა და ფატალური შედეგი მოჰყვა.

ამ დროისთვის რუსთავის საქალაქო სამმართველოს თანამშრომლები საქმეზე აქტიურ საგამოძიებო მოქმედებებს აგრძელებენ. პოლიციის მიზანია ჩხუბში მონაწილე სხვა პირების იდენტიფიცირება და მათი პასუხისგებაში მიცემა.

საქმეზე გამოძიება საქართველოს სისხლის სამართლის კოდექსის 117-ე მუხლის მე-2 ნაწილით მიმდინარეობს. აღნიშნული მუხლი დანაშაულის დამტკიცების შემთხვევაში 8 წლამდე ვადით თავისუფლების აღკვეთას ითვალისწინებს.