აშშ-სა და ირანს შორის მიღწეული შეთანხმება, რომელიც ომის დასრულებას ითვალისწინებს, საერთაშორისო თანამეგობრობის მიერ პოზიტიურად შეფასდა. გაეროს გენერალურმა მდივანმა, ანტონიუ გუტერეშმა დოკუმენტს „მნიშვნელოვანი ნაბიჯი“ უწოდა.

აშშ-ის პრეზიდენტმა, დონალდ ტრამპმა, რომელმაც 14 ივნისს 80 წლის იუბილე აღნიშნა, შეთანხმების შესახებ განცხადება „UFC Freedom 250“-ის ღონისძიების მიმდინარეობისას გააკეთა. პრეზიდენტის თქმით, 19 ივნისს ხელმოწერის შემდეგ, ჰორმუზის სრუტე, რომელიც გლობალური ენერგომომარაგებისთვის კრიტიკულად მნიშვნელოვანია, სრულად გაიხსნება.

ტრამპმა სოციალურ პლატფორმა Truth Social-ზე დაწერა, რომ ეს შეთანხმება მთელ ახლო აღმოსავლეთში მშვიდობისა და უსაფრთხოების გარანტი იქნება.

ირანის მხარემ, საგარეო საქმეთა მინისტრის მოადგილის, ქაზემ ღარიბაბადის პირით, დაადასტურა, რომ ომი ყველა ფრონტზე, მათ შორის ლიბანში, დაუყოვნებლივ დასრულდა. თეირანის ცნობით, საბოლოო შეთანხმებას გაეროს უშიშროების საბჭოს შესაბამისი რეზოლუცია დაამტკიცებს.

შეგახსენებთ, რომ 2026 წლის თებერვალში დაწყებულმა კონფლიქტმა რეგიონში მძიმე შედეგები გამოიწვია. საომარი მოქმედებების დროს დაიღუპა არაერთი მაღალჩინოსანი, მათ შორის ირანის უზენაესი ლიდერი აიათოლა ალი ხამენეი. განადგურდა სამხედრო და სამოქალაქო ინფრასტრუქტურა, რასაც მშვიდობიან მოსახლეობაში მსხვერპლი მოჰყვა.

კონფლიქტში ჩართული იყო ლიბანის „ჰეზბოლაც“, რომელიც ისრაელის მიმართულებით რაკეტებს ისროდა, რასაც საპასუხო დარტყმები მოჰყვა. ეკონომიკური თვალსაზრისით, ომი განსაკუთრებით მძიმე გამოდგა, რადგან ჰორმუზის სრუტის ჩაკეტვამ მსოფლიო ნავთობისა და გაზის მიწოდების ჯაჭვი შეაფერხა. აპრილში მიღწეული ცეცხლის შეწყვეტის შემდეგ, მოლაპარაკებები პაკისტანის შუამავლობით მიმდინარეობდა.