იტალიური საავტომობილო გიგანტის, Ferrari-ს პირველი სრულად ელექტრონული მოდელის, Luce-ს პრეზენტაციას აჟიოტაჟი მოჰყვა. ავტომობილი, რომლის ფასიც 640 000 დოლარს (დაახლოებით 550 000 ევროს) შეადგენს, კრიტიკის სამიზნე გახდა როგორც ინვესტორების, ისე ავტოინდუსტრიის ვეტერანების მხრიდან.

კომპანიის აღმასრულებელმა დირექტორმა, ბენედეტო ვინიამ მოდენაში გამართულ შეხვედრაზე განაცხადა, რომ ფასი სრულად ასახავს იმ ინოვაციურ მიდგომას, რომელიც Ferrari-მ პირველი ელექტრომობილის შექმნისას გამოიყენა. ვინიას თქმით, მოდელი უკვე სარგებლობს დიდი მოთხოვნით, მათ შორის უმდიდრეს კლიენტებს შორის.

კრიტიკა დიზაინისა და იმიჯის გარშემო

Luce-ს გამოსვლას თან ახლდა ბაზრის ნეგატიური რეაქცია: პრეზენტაციის შემდეგ Ferrari-ს აქციები მილანის ბირჟაზე 8%-ით დაეცა. უკმაყოფილება გამოთქვა კომპანიის ყოფილმა თავმჯდომარემ, ლუკა დი მონტეზემოლომ, რომელმაც ავტომობილს Ferrari-ს ისტორიისთვის „სირცხვილი“ უწოდა და მოუწოდა კომპანიას, მასზე საფირმო ლოგო — „მოცეკვავე ცხენი“ მოაშორონ.

კრიტიკას შეუერთდა იტალიის ტრანსპორტის მინისტრი მატეო სალვინიც. მან სოციალურ ქსელ X-ში აღნიშნა, რომ ავტომობილი ესთეტიკურად არ შეესაბამება ბრენდის ტრადიციებს და ეჭვი შეიტანა მის „ინოვაციურობაში“.

ტექნოლოგიური ამბიცია

Luce არის Ferrari-ს ისტორიაში პირველი ხუთადგილიანი ავტომობილი. ტექნიკური მახასიათებლები შთამბეჭდავია: ის 100 კმ/სთ-ს (60 mph) 2.5 წამში ავითარებს, მაქსიმალური სიჩქარე კი დაახლოებით 310 კმ/სთ-ია (192 mph). დიზაინზე Apple-ის ყოფილი მთავარი დიზაინერის, ჯონი აივის სააგენტომ, LoveFrom-მა იმუშავა.

ბენედეტო ვინიამ ხაზგასმით აღნიშნა, რომ Luce-ს არაფერი აქვს საერთო ჩინურ ელექტრომობილებთან ან სხვა ბრენდების ანალოგიურ პროდუქციასთან. მისი თქმით, ახალი ტექნოლოგია მოითხოვს განსხვავებულ დიზაინს, რაც პატივისცემას იმსახურებს.

„თქვენ უნდა ნახოთ Luce, რათა მიხვდეთ, რომ მას არაფერი აქვს საერთო სხვა ბრენდების ელექტრომობილებთან“, — განაცხადა ვინიამ.

მიუხედავად აჟიოტაჟისა, ავტოანალიტიკოსები ინვესტორებს სიმშვიდისკენ მოუწოდებენ და აცხადებენ, რომ რაიმე სახის შეშფოთებისთვის ჯერ ადრეა. კომპანია კი აცხადებს, რომ მოდელის ყველა კომპონენტი მარანელოში, შიდა რესურსებით დამზადდა.