ასაკის მატებასთან ერთად მეხსიერება და კოგნიტური უნარები ხშირად სუსტდება. თუმცა, მეცნიერები დიდი ხანია თანხმდებიან, რომ აქტიური გონებრივი და ფიზიკური დატვირთვა ტვინის ჯანმრთელობისთვის გადამწყვეტია. უახლესი კვლევა ადასტურებს, რომ მუსიკალური ინსტრუმენტის შესწავლა 70 წლის შემდეგაც კი შესაძლებელია და ეს პროცესი ტვინისთვის სასარგებლოა.

კიოტოს უნივერსიტეტის მკვლევრებმა შეისწავლეს, თუ რა გავლენას ახდენს მუსიკალური ინსტრუმენტის ათვისება ხანდაზმულებზე. 2020 წელს დაწყებულმა ექსპერიმენტმა აჩვენა, რომ ოთხთვიანი პრაქტიკის შემდეგ მონაწილეებს გაუუმჯობესდათ მეხსიერება და ტვინის იმ ნაწილების ფუნქციონირება, როგორიცაა პუტამენი და ნათხემი.

ახალმა კვლევამ, რომელიც ოთხ წელს მოიცავდა, ამ შედეგების გრძელვადიანი ეფექტი შეამოწმა. მონაწილეები, რომელთა საშუალო ასაკი 73 წელი იყო, ორ ნაწილად გაიყვნენ: ნაწილმა განაგრძო მუსიკალური პრაქტიკა, ნაწილმა კი შეწყვიტა და სხვა ჰობი აირჩია.

ოთხი წლის შემდეგ ჩატარებულმა MRI კვლევებმა მკაფიო განსხვავებები გამოავლინა. მათ, ვინც მუსიკას თავი დაანება, აღენიშნებოდათ მეხსიერების დაქვეითება და პუტამენის რუხი ნივთიერების მოცულობის შემცირება. საპირისპირო სურათი მიიღეს მათ, ვინც დაკვრა განაგრძო — მათთან ტვინის ეს სტრუქტურა და მეხსიერების უნარი შენარჩუნებული იყო.

„გვაოცა იმ ფაქტმა, რომ ხანდაზმულთა ტვინში ცვლილებები სწორედ ამ ორ ზონაზე კონცენტრირდა. ეს ასაკთან დაკავშირებული დეგრადაციის პრევენციის ეფექტური გზაა“, — აცხადებს კვლევის ავტორი კაორუ სეკიამა.

მეცნიერები ხაზს უსვამენ, რომ მუსიკა განსაკუთრებით ღირებულია მათთვის, ვისაც ჯანმრთელობის პრობლემების გამო ინტენსიური ფიზიკური ვარჯიში არ შეუძლია. ხელოვნების ეს დარგი გონებრივი აქტივობის შენარჩუნების ხელმისაწვდომი და სასიამოვნო ალტერნატივაა.

დასკვნა ცალსახაა: მუსიკალური ინსტრუმენტის შესწავლა არასდროს არის გვიანი. პირიქით, ხანდაზმულ ასაკში დაწყებულმა სწავლამ შეიძლება მნიშვნელოვანი სარგებელი მოუტანოს ტვინის მუშაობას და გააუმჯობესოს ცხოვრების ხარისხი.