შაქრის რაციონიდან სრულად ამოღება, შესაძლოა, ჯანმრთელობისთვის არც ისე სასარგებლო აღმოჩნდეს, როგორც ეს ერთი შეხედვით ჩანს. ჩიკაგოში, ენდოკრინული საზოგადოების ყოველწლიურ შეხვედრაზე (ENDO 2026) წარდგენილმა ახალმა კვლევამ აჩვენა, რომ შაქრის სრული დეფიციტი საჭმლის მომნელებელ და მეტაბოლურ ჯანმრთელობაზე უარყოფითად აისახება.

ქუვეითის დასმანის დიაბეტის ინსტიტუტის მკვლევრებმა შეისწავლეს, რა გავლენას ახდენს ორგანიზმზე დაბალცხიმიანი დიეტა, საიდანაც მთლიანად არის გამორიცხული საქაროზა — შაქრის ერთ-ერთი ყველაზე გავრცელებული ფორმა. 16-კვირიანი ექსპერიმენტის განმავლობაში მათ შეადარეს ის თაგვები, რომლებიც შაქრის გარეშე იკვებებოდნენ, იმ ჯგუფთან, რომელთა რაციონიც დაბალანსებული იყო.

დასკვნა საკმაოდ მოულოდნელი აღმოჩნდა. კვლევის ხელმძღვანელის, დოქტორ რაშიდ აჰმადის განცხადებით, საქაროზის რაციონიდან სრულად ამოღებამ შესაძლოა დაარღვიოს ნაწლავური მიკროფლორას ბალანსი, ხელი შეუწყოს ანთებით პროცესებს და გამოიწვიოს მეტაბოლური დისფუნქცია.

ექსპერიმენტის შედეგად, შაქარზე უარის მთქმელ თაგვებში გამოვლინდა ინსულინის მიმართ რეზისტენტობა და გლუკოზის კონტროლის გაუარესება. მიუხედავად იმისა, რომ საკონტროლო ჯგუფთან შედარებით მათი წონა არ შეცვლილა, მათ ორგანიზმში დაფიქსირდა ნაწლავური ანთების ნიშნები და ღვიძლის ცხიმოვანი დაავადებისთვის დამახასიათებელი ცვლილებები.

„ეს კვლევა ხაზს უსვამს, რომ დაბალანსებული კვება გაცილებით მნიშვნელოვანია, ვიდრე მხოლოდ შაქრის უპირობო გამორიცხვა“, — აღნიშნავს დოქტორი აჰმადი. მეცნიერთა თქმით, მიკრობიომის ჯანმრთელობა პირდაპირ არის დამოკიდებული კვების რაციონში ნახშირწყლების სწორ გადანაწილებაზე.

მკვლევრები მიიჩნევენ, რომ სამედიცინო რეკომენდაციები მომავალში უფრო მეტ ყურადღებას დაუთმობს ნაწლავური მიკრობიომის სტაბილურობას და არა მხოლოდ შაქრის მოხმარების მკაცრ შეზღუდვას. ეს მიდგომა განსაკუთრებით მნიშვნელოვანი იქნება მეტაბოლური დარღვევების, ქრონიკული ანთებებისა და ღვიძლის დაავადებების პრევენციისთვის.

კვლევა კიდევ ერთხელ ადასტურებს, რომ ორგანიზმის ჰომეოსტაზის შესანარჩუნებლად საჭიროა არა უკიდურესობები, არამედ გააზრებული და დაბალანსებული მიდგომა კვების რაციონის მიმართ.