აშშ-სა და ირანს შორის სამხედრო დაპირისპირების დასრულების შესახებ ოფიციალური შეთანხმება გაფორმდა. ინფორმაციას BBC-ზე დაყრდნობით, დიდი ბრიტანეთის, საფრანგეთის, გერმანიისა და იტალიის ლიდერები ადასტურებენ.

დიპლომატიური გარღვევა

ევროპული ქვეყნების გაერთიანება, რომელიც „E4“-ის სახელითაა ცნობილი, შეთანხმებას ისტორიულ მოვლენად აფასებს. ლიდერების განცხადებით, ეს არის შესაძლებლობა, აღდგეს რეგიონული სტაბილურობა და დასტაბილურდეს გლობალური ეკონომიკა.

„ჩვენ ვულოცავთ ამერიკის შეერთებულ შტატებს, ირანის მთავრობას და ყველა იმ მხარეს, ვინც შუამავლობით იყო დაკავებული, მათ შორის ყატარსა და პაკისტანს,“ — ნათქვამია ერთობლივ განცხადებაში.

სრული თავისუფლება ჰორმუზის სრუტეში

შეთანხმების ერთ-ერთი მთავარი პირობა ჰორმუზის სრუტის სასწრაფო და უპირობო გახსნაა. ლიდერები ხაზს უსვამენ, რომ ნავიგაციის თავისუფლება გლობალური ეკონომიკური უსაფრთხოებისთვის კრიტიკულად მნიშვნელოვანია.

„მოვითხოვთ, რომ შეთანხმება შესრულდეს სწრაფად და ყოვლისმომცველად. ჰორმუზის სრუტეში ნავიგაციის თავისუფლება არ უნდა იყოს შეზღუდული,“ — აღნიშნავენ ევროპელი ლიდერები.

ბირთვული პროგრამა და სანქციები

დასავლური სახელმწიფოები კატეგორიულ პოზიციას ინარჩუნებენ ირანის ბირთვულ პროგრამასთან დაკავშირებით. მათი თქმით, ირანს არასოდეს უნდა ჰქონდეს ბირთვული იარაღი.

ამავდროულად, მხარეები მზად არიან განიხილონ ირანის წინააღმდეგ დაწესებული სანქციების მოხსნა. ეს პროცესი დამოკიდებული იქნება ირანის მხრიდან გადადგმულ მკაფიო და გადამოწმებად ნაბიჯებზე, რომლებიც ბირთვული პროგრამის შეზღუდვას შეეხება.

მხარდაჭერა ლიბანს

გარდა ირანთან მიღწეული შეთანხმებისა, ევროპელი ლიდერები კიდევ ერთხელ ადასტურებენ მხარდაჭერას ლიბანის სუვერენიტეტისა და ტერიტორიული მთლიანობის მიმართ. ისინი აცხადებენ, რომ მზად არიან ინტენსიურად იმუშაონ ყველა რეგიონულ პარტნიორთან გრძელვადიანი დიპლომატიური მშვიდობის მისაღწევად.