„კოალიცია ცვლილებისთვის“ ერთ-ერთი ლიდერი, ელენე ხოშტარია, რომელიც ამჟამად პატიმრობაში იმყოფება, სოციალურ ქსელში ციხის ადმინისტრაციასთან მიმდინარე კომუნიკაციის შესახებ ინფორმაციას ავრცელებს. მისი თქმით, ბოლო პერიოდში ადმინისტრაციის მხრიდან კონტაქტი შედგა, თუმცა რეალური ცვლილებები ჯერ არ იგრძნობა.

ხოშტარიას განცხადებით, მიუხედავად დაპირებებისა, პრაქტიკული ნაბიჯები ჯერ არ გადადგმულა. ამ დრომდე არ შემდგარა შეხვედრა მკურნალ ექიმთან, თუმცა პოლიტიკოსს ჰქონდა კომუნიკაცია, რომლის მიხედვითაც, სამედიცინო ჩართულობა უახლოეს მომავალში იგეგმება.

„ჯერ არანაირი კონკრეტული ნაბიჯები არ გადადგმულა, არც მკურნალ ექიმთან ყოფილა შეხვედრა, მაგრამ დამპირდნენ, რომ იქნება. როგორც კი მკურნალობის რეალური გეგმა შედგება, საზოგადოებას აუცილებლად ვაცნობებ“, - წერს ხოშტარია.

პოლიტიკოსი ასევე გამოეხმაურა მის ადვოკატს, შოთა თუთბერიძეს, რომელიც ბოლო პერიოდში ხელისუფლების კრიტიკის სამიზნე გახდა. ხოშტარიამ სრული მხარდაჭერა გამოუცხადა თავის დამცველს და აღნიშნა, რომ ადვოკატის მიერ გაჟღერებული ინფორმაცია სრულ სიმართლეს შეესაბამება.

3 ფოტო — დააჭირე გასადიდებლად
„ხაზგასმით მინდა ვთქვა, რომ პასუხს ვაგებ ყველა სიტყვაზე, რომელიც შოთამ ბრიფინგზე თქვა. რეჟიმთან რაიმე დისკუსიაში შესვლის კი, არანაირი სურვილი არ მაქვს“, - განაცხადა ელენე ხოშტარიამ.

შეგახსენებთ, რომ ადვოკატმა შოთა თუთბერიძემ საზოგადოებას აცნობა ხოშტარიას ჯანმრთელობის მდგომარეობის დამძიმების შესახებ. მისი თქმით, პოლიტიკოსს აღენიშნება სახსრების ძლიერი ტკივილი და გადაადგილების სირთულეები, რის გამოც იგი ყავარჯნების გამოყენებას საჭიროებს, ზოგჯერ კი წერაც კი უჭირს.

საზოგადოება ელოდება ინფორმაციას სამედიცინო გეგმასთან დაკავშირებით, რომელსაც ხოშტარია, მისივე თქმით, უახლოეს პერიოდში გაასაჯაროებს.